上星期五帶咗 Felix 到太陽島(港灣豪庭分校)參加面試.....
此校面試方式並不是坐定定, 問問題. 而係老師帶住 Felix 到玩具角, 問 "呢架係咩黎嫁?" "呢樣叫咩吖?"咁. 不過佢依然只識笑, 冇答到.
之後老師要 Felix 攞個豆袋俾爸爸,媽媽, 佢就做到. 然後我同老師講, 佢都係剛剛開始講說話, 所以進度係慢咗啲. 老師話小朋友好快就追得上, 跟住話面試完畢, 印埋張"取錄通知書"就可以. 我同爸爸即時呆咗, 咁就收咗? 心想此校應該以先到先得方式收生, 只係循例接見啫.
不過此校乃係我地第五選擇, 但係經過老師解說原來一班只收15名學生, 爸爸一聽就喜歡. 佢覺得小班教學, 老師會更關注到每位學生, 頓時升至第三志願. 經過我地商討後, 都係先交留位費, 等到首兩個志願面試有結果再算.
