剛過去嘅星期六日, 節目非常豐富, 好開心啊.......

星期六, 同姑媽姑丈帶咗 Felix 到馬灣沙灘影日落, 之後仲食埋晚飯先走. 原本諗住去舊區個邊行吓, 但因為姑媽姑丈遲到, 怕太黑路難行, 所以冇去到. 下次有機會再去過先得.

星期日, 我地就同埋姨姨, 父父 (舅父), 契爸爸到清水灣游水. 尋日天氣好到不得了, 唔太曬, 又唔太熱, 都唔似天文台預報咁嘅 (因為起初預料會有雨). 不過黃昏返到屋企, 就閃電加雷雨. 我地真的好好彩啊....

尋日海灘出奇地少人, 車位仲大把添, 契爸爸話早知揸車喎, 不過又點會預計到吖. 我地大約二時到達, 搵到個有利位置後, 便帶 Felix 出海.

Felix 真係相當大膽, 上次成個人浸落水都唔驚. 今次仲時不時推開我地隻手, 自己行及玩水, 認真"沙pork"......

相信今次係今年最後一次下水喇, 天氣都會開始轉涼. 之後嘅活動可以去吓赤柱, 上吓山頂咁. 秋高氣爽嘅天氣, 最適合我地三口子喇 (因為我地一家三口都超大汗, 哈哈......)

返到屋企先記起, 冇影到三口子家庭照喎. 咁難得有人同我地揸機, 咁都錯過, 真失敗, 唉........