上星期日, 我地與婆婆飲完茶後, 就即興到沙田彭福公園行一行. 我地先坐巴士到沙田, 再乘港鐵到火炭, 經過銀禧, 再跟指示牌去. 點知行到馬場門口, 就唔識行, 唯有問一問馬場門口嘅保安. 誰知一問之下, 先知道原來跑馬日, 彭福公園係唔開放喎 (因為當日有盃賽). 我當時幾咁失望, 俾個港鐵職員點咗我地係火炭落車, 去到先知馬場站近啲, 仲要抱住唔肯行嘅 Felix 行到老遠嘅馬場門口, 先至知道冇開. 不過之後見到 Felix 望住啲馬馬係度跑, 佢就好開心咁話 "馬馬喎", 我條氣先順返啲.

最後我地唯有同門口個馬馬大氣球影吓相就走喇......

(下次去邊都係上網check吓先好啲.......)

之後我地就去咗一田逛逛街, 細姨就提意行玩具反斗城, 買聖誕禮物俾 Felix 同澄澄. 揀咗一輪之後, 澄澄媽媽就揀咗lego 積木. 而 Felix 行到某一專櫃就停落黎, 不停叫 "湯密士,湯密士", 無錯佢就係 ~ Thomas 火車頭, Felix 終於搵到佢嘅禮物喇. 不過佢一手攬住 Thomas, 一手攞住 James, 想兩架都要. 跟住我表示只可要一架, 佢就開始扭計, 唉....最唔想發生嘅事開始喇, 佢坐係地下扭. 於是我極速抱起佢, 然後好認真同嚴厲地講佢聽只可以要一架, 佢就收聲攬住 Thomas. 好在都只係擾攘十幾秒左右, 唔係就核突死囉.....

沿路返屋企, 佢都冇放低過架 Thomas, 一回到家就急不及待地拆開包裝盒, 入好電池後, Felix 就好開心咁玩佢嘅新玩具. Thomas 一路行, 佢就一路跟, 好攪笑啊.....

上星期六, 我地其中一位由中一開始認識嘅朋友 ~ 盈盈姨姨結婚喇!

(好難得嘅一張合照.....)

Felix 仲好笑, 全日一叫佢影相就擺 pose,哈哈....

上星期某天, Felix 搵到我收得好埋舊年嘅過年裝束, 因為我都諗住今年要買過套, 所以包好咗諗住俾人. 點知 Felix 話要著, 一著之下先發覺仍然啱身, 係頂帽帶唔落啫. "屎"火囉, 點解會仲啱著嫁......

著好之後, Felix 係咁叫 "媽咪影相,媽咪影相", 仲擺埋 pose 添, 由嗰日開始我先知, Felix 已經識擺 pose 影相喇.......

(上年拍嘅.....上年著條褲就真係長咗啲,但係隻袖到今年都係一樣長ka.....)

昨天, 我們和表妹一家返婆婆屋企食飯, 兩老表又可以一齊玩吓喇! 今次 Felix 仲表現出哥哥嘅本色, 幫手餵妹妹飲奶奶添....

上星期六, 輪到第一志願嘅 "創價幼稚園" Interview. 早上整理好 Felix 所有野之後, 就坐的士出發.

九龍塘區嘅幼稚園, 真係有別於屋村嗰啲. 校舍又大又靚, 又有 outdoor playground , 老師又多, 又有規模, 佢地一個課室就等於人地兩個課室.

我地先到二樓課室門口報到, 之後就上三樓預先準備好玩具嘅 hall 玩住等. 等咗大約半小時左右, 就到課室 interview 喇!

一入到課室就見到有兩位老師做 interview, Felix 就好細聲講咗句 "老師早晨", 好在老師們都聽到. 之後老師先問 Felix "今日邊個同你黎嫁?呢個係邊個?" 大大聲地答 "爸爸" "呢個?" "媽咪". 然後老師俾咗幾個 logo 佢, 要佢疊高. 與此同時, 老師問我地平日邊個湊佢? 是否一同居住? 我地嘅返工時間? 放假帶 Felix 去邊?

之後老師攞出一籃膠食物出來, 有香蕉...橙...粟米...魚, Felix 都能一一道出. 又問 Felix 最喜歡邊樣, 佢就答 "蕉蕉". 最後老師問我地對 Felix 有咩期望, 雖然呢個問題我一早就知佢地會問, 但係我都諗唔到點答先好. 所以都係話唔須要佢有啲咩大成就, 只望佢平平穩穩咁, 我諗都應該切合到佢地嘅辦學理念 "以人為本" 啩.

我覺得呢間校學除咗 interview 小朋友之外, 都 interview 埋大人, 真係同之前見嗰啲好唔同. 佢地用咗一半時間去觀察小朋友, 另一半時間去問家長問題, 所以真係冇咩信心. 不過都唔打緊, 依家知道明我收咗 Felix, 個心都定啲.

同爸爸傾過若果創價收 Felix 下午班的話就唔考慮, 因為上課時間 1:45-4:45, 唔係太好. 不過若然收上午班的話, 就要認真考慮, 因為加埋校車費, 每月支出貴過明我一倍, 又要擔心坐校車返學放學嘅風險, 唉, 認真頭痛.....

07/12/09

今日剛剛收到信, 結果係.........唔收. 另一位朋友個仔都仲有機會waiting list, 我地 Felix 就已經 reject 咗, 連 waiting 都冇機會. 不過仲好, 疊埋心水讀明我.....

今日我地到屋企樓下明我幼稚園 Interview, 不過媽媽我竟然將此事忘記得一乾二淨. 直到12時左右, 學校打電話來提醒, 唉......真失敗. 此時, 我非常擔心會影響到學校收唔收 Felix, 不過爸爸話 "大人唔記得啫, 唔關細路事嘅". (又係嘅, 細路仔都未識咩係遲到喇, 老師唔會計算在內啩.)

我地用極速時間去到幼稚園, 結果我地係最後一個 Interview.

首先會見老師, 老師先問 Felix 叫咩名, 佢好快就答出. 之後再拿出個波波, 問 Felix "呢個係咩黎嫁", 不過要問三次才答出. 然後叫 Felix 拋俾老師, Felix 又拋回給老師, 來回兩次. 之後老師拿出分開咗三件嘅的士砌圖, 要佢併返好. Felix 三兩下便砌好, 並說出 "的士". 最後老師講咗個 "小豬打走狼先生" 嘅故事, Felix 就唔太專心聽 (其實佢不嬲都唔鐘意聽故事嘅). 然後老師攞住兩幅圖, 問狼先生係俾小豬打走, 還是小狗. Felix 隨手攞起小豬, 老師仲讚 Felix 叻叻添, 不過我覺得係撞彩中囉.....

係我好開心 Felix 做到所有要求嘅時候, 最後見校長就失敗. 佢突然要玩我手袋, 完全唔理校長嘅提問. 唉..... 不過校長話, 佢地唔會睇單一表現, 會睇埋老師評分嘅.

其實早幾日知道迦南都收咗佢, 不過我地心目中明我呢間志願係先過迦南, 所以都幾想知收唔收 Felix. 下星期就有結果, 好快就知道收唔收, 希望得喇....

19/11/09 

剛剛收到明我的信, 收咗 Felix 喇! 仲要係上午班..... 好開心直至現時為止, interview 三間, 三間都收咗佢. 不過迦南嘅留位費, 就泡湯喇~~

不知不覺 Felix 已經 2 歲零3個月, 除了說話進步不少之外, 行為認知上亦有大發現.

因為 Felix 說話遲咗起步, 所以現在都未能自己說出一句完整嘅句子. 每次都只會 copy 我地嘅說話, 或者能說出幾組單字, 將之串連起來, 便能明白他的意思.

最近 Felix 仲學識自己 play DVD, 首先揀好今日想睇隻碟之後, 就去按 on/off 制, 然後按 eject, 放隻 disc 入去, 再坐落梳化, 攞 remote 按 play, 之後坐定定等開場. 整個步驟都一手一腳自己攪掂, 嫲嫲仲話佢自己都唔識開, 竟然 Felix 仲叻過佢喎, 勁!

Felix 係屋企嘅行為基本上冇咩進步, 依然係一發脾氣就掟野, 不過次數比之前少咗啲. 每次我都不厭其煩地, 跪下與 Felix 相目對望, 解釋點解唔可以咁做. 雖然佢每次都好似唔係好睬我咁, 但我知佢係聽到嘅, 所以我都係不停咁講 (好似傻婆咁).

不過 Felix 出到街, 或是係陌生人面前就非常之聽話, 我一話 "no" 佢就即刻 stop. 總之我叫佢做咩, 佢都做得妥妥當當, 好聽話咁. 人地唔知仲以為佢係屋企一樣咁乖添.

戒片方面都叫做成功咗一大半, 好似嫲嫲每日下午帶佢到公園玩咁, 都冇同佢著尿片, Felix 一想屙時就會叫 "噓噓". 不過夜晚始終都唔放心, 都係著住穩陣. 之但係 "ng ng" 就點都唔成功, 每次一見佢 "運功" 時, 就叫佢上厠所屙, 但係佢話唔好唔好. 佢都只係試過一次叫 "ng ng", 果次能夠成功地上厠大解, 不過我因為要開OT而錯過咗.....

家務方面, 由上月開始 Felix 已經非常幫手, 曬衫; 執碗; 掃地; 抹地; 甚至連接線生都做埋. 收衫時, 又識分辨各人嘅衣服. 媽媽手機一响, 就立即攞俾我, 做事快手快腳.

另外, 今早對面屋嘅姨姨話我知, 昨天問佢 "媽咪係邊呀?" "返工"; "爸爸係邊呀?" "搵錢錢"; "嫲嫲係邊呀?" "煮飯". 所有對答快而準, 真係超叻呀! 頓時發覺 Felix 大個仔咗好多, 我覺得好開心又好欣慰啊!

直至目前為止睇得出 Felix 嘅性格都幾倔強, 唔喜歡做嘅野, 你點迫佢都唔得, 有時利誘佢都冇用. 佢有自己一套, 想做嘅時候先會做. 管教方面都係時間落啲功夫學習及了解, 不過自從 Felix 嘅出世之後, 我發覺自己EQ高咗好多. 以前嘅我稍一不滿就會發脾氣 (尤其對 Felix ba), 我覺得係教 Felix 嘅同時, 亦都提高咗自己嘅 EQ, 其實咁都唔錯吖........

昨天星期天, 雖然爸爸無放假, 但我都能夠一個人帶 Felix 出街街. 事關早就約好婆婆, 姨姨, 父父, 同澄妹妹佢地到迪欣湖野餐去.....